Wir graf Hainreich von Gortz vnnd von Tirol, vogt der gotzheuser zw Agley, zw Triennt vnnd zu Prichsen veriehen an disem brief vnnd thuen khund allen den, die in sehen oder horen lesen, die nun sind oder hernach khunftig werden, das wir mit guet vnd verdachten muet Haintzlein von Auersperg, seinen brudern vnnd iren erben fur sibentzehen markh schilling, die wir ime, Haintzlein gelten sollen vnnd auch vmb die gueten diennst, die er, seine brueder vnd ir erben vnns vnnd vnnsern erben ansehenlichen thuen sollen, drey hueben, dazw Tragern, die ain Stefan paut, die annder Pero, die drit aber der annder Pero, verlichen haben zw rechtem lehen, mit allem so vnd dartzue gehort, gesuecht vnnd vngesuecht, gepaut vnd vngepaut, wie das genannt sey, mit solichem geding vnnd ausgenombner red. Ob wir oder vnnser erben dem oftgenannten Haintzlein, seine brueder oder ir erben in den funf jaren, die an nagst khunftig werden, ime die vorgenannten pheningen ermonnan, so sollen vnnser hueben die vorgenannten vnns vnnd vnnsern erben mit allem dem vnnd dartzuo gehört genntzlichen ledig sein vnnd aber das wirs in den funf jaren nicht losten, so sollen sy zu rechtem lechen haben, nutzen vnnd niessen, mit vollem rechten als vorgeschriben steet vnnd nach allem iren willen. Daruber zw ainer stettigkhait geben wir in disen brief mit vnnserm anhanngeten innsigl. Des sind zeugen: Greif von Reutenberg, Franntzisco von Hungerspach, Vozalt vnd Seifrid von dem Neuen Merkhtlein vnnd annder erber leut. Der brief ist geben da zw Gortz, nach Cristy geburd verganngen in den dreytzehenhundert vnnd darnach im 17 jar, in der 15n indiciam, des viertzehenden tags eingeunden junio.