Wir Heinrich von gotes gnaden chunch cze Peheim vnd cze Polan, herczog cze Charenden vnd graf cze Tyrol vnd cze Gorcz veriehen offenleich an dysem prief, daz wir vns dez wol eruaren haben fuer ain gancze warhait, daz vnser getrewn Volker vnd Herwort, pruder von Owersperch die acht nicht verdient habent, da wier sew in gelegt hetten. Da von wir sew ganczleich auz der acht lazzen haben vnd in furpaz nyemen darvm czu sprechen schol. Darvmb geb wyr in dyssen offen prif mit vnsern anhangentem insigel. Der prief ist geben cze Inspruk, nach Christez gewurd drewczehen hundirt jar vnd darnach in dem czwain vnd dreyzchistem jar, an sand Nyclaws abent.