Wir Heinreich von gotes gnaden chunik cze Peheim vnd cze Polan, herczog cze Cherenden vnd graf cze Tyrol vnd cze Gorcz vergehen offenleich an disen prief vnd tun chunt allen den, die in sehent, horent oder lesent, daz wir willichleich vnd mit wol verdachtem mut Volkern vnd Herborten prudern von Owersperch vnd iren erben versaczt haben die maut, da cze Rayschicz vmb drithalb hundert march Agliger phenning mit so ous genomener red, swan si vom Gralant ledich wirt, der schols vier jar inne haben. So ist ez der Owersperger sacz in aller der weis vnd ez hie geschriben stet. Swenn wir oder vnser erben den vorgenanten pruder von Awersperch drithalb hundert march Agliger phenning geben, so ist vnser maut cze Rayschczicz ledich. Die weil in der phenning nicht geben, die weil schullen si di maut geruchleich inne haben. Daz wir dicz stet vnd vnuerprochen bleibe, darvber geb wir in disen offen prief mit vnserm anhangentem insigel. Der prief ist geben cze Inspruk, nach Christes geburd drewczhen hundert jar vnd darnach in dem czwain vnd dreisgistem jar, an sand Niklaus abent.